Mamlakatdagi besh millionga yaqin musulmon yashaydi. So‘rovda ishtirok etgan musulmonlarning 80 foizi Ramazon oyida ro‘zani albatta tutishini va masjidlarga muntazam borib turishini aytgan.
Mahalliy musulmonlar jamoati Ramazon oyida masjidlarga mashhur Islom ulamolarini taklif etib, ma’ruzalar tashkil qilmoqda. Ulamolar Frantsiyadan hamda Jazoir, Marokash yoki Turkiyadan ham taklif qilinishi mumkin.

«Rossiya Federatsiyasida Islom» agentligining ta’kidlashicha, shu yil iyul oyida Marokash hukumati Yevropaga ana shunday olimlardan 176 nafarini yuborishini ma’lum qilgan bo‘lib, ularning yarmidan ko‘pi Ramazon oyida aynan Frantsiyada bo‘ladi. Bu olimlar Yevropa xalqiga Islomni tanishtiradilar, ko‘pchiligi marokashlik bo‘lgan mahalliy musulmonlar o‘rtasida maorif masalalari bilan shug‘ullanadilar.

Frantsiya ma’muriyati vakillari o‘zlarining arab hamkasblaridan orqada qolmay, xalqlar va madaniyatlararo muloqotga o‘z hissalarini qo‘shishga intilmoqdalar. Jumladan, shu yil uchinchi bor Parij shahri meriyasi «Ramazon kechalari» deb atalgan tadbir tashkil qilmoqda. Tashkilotchilarning fikricha, bu yil 9 sentyabrdan 2 oktyabrgacha davom etadigan ushbu xayrli tadbir Yevropa mamlakatlarida Islomning bugungi qiyofasini namoyish qilishga, g‘arb kishilarida dinimiz haqda to‘g‘ri tasavvur hosil bo‘lishiga xizmat qiladi. «Ramazon kechalari» doirasida badiiy, hujjatli va ilmiy-ommabop filmlar namoyish qilinadi, kontsertlar, ko‘rgazmalar o‘tkaziladi hamda ro‘zadorlar uchun iftorliklar tashkil qilinadi. Frantsiya IIV ma’lumotlariga ko‘ra, bugungi kunda mamlakatda 1890 ta masjid va namozxonalar ishlab turibdi.