Shu kunlarda Britaniya matbuoti O‘zbekistonlik Alisher Usmonovning Londonda yangi koshona sotib olgani haqida yozgan.

Bir qur ko‘z tashlashga imkon beradigan ro‘znoma akslari shaharning eng badavlat insonlar yashovchi dahasidagi yam-yashil daraxtlar ichidan viqor to‘kib turgan oppoq saroysifat binoni ko‘z-ko‘z etadi.

54 yashar Alisher Usmonovning mul-mulki hozirda 5 milliard 73 million funt yoki 10 milliard dollardan ko‘proqni tashkil etishi aytiladi.

Sunday Times ning xabar berishicha, asli o‘zbekistonlik milliarder Alisher Usmonov London shimolida joylashgan yer-mulki uchun 48 million funt-sterling to‘lagan.

Ushbu mulk avval Qatar amiri Hamad al-Taniga qarashli bo‘lgan.

Haftanomaga ko‘ra, 54 yoshli Alisher Usmonov ko‘chmas mulkni Men orolida ro‘yxatdan o‘tgan shirkat orqali shu yilning mart oyida sotib olgan.

Ammo korchalonning Londondagi matbuot kotibi sharh berishni istamagan.

Ushbu ko‘chmas mulk haqida ma’lumot juda cheklangan.

Bir necha gektarlik yerda joylashgan bino tashqaridan ko‘rinmaydi, matbuotga esa, bu binoning bir dona surati yetib kelgan, xolos.

Bino 1840 yilda britaniyalik mashhur arxitektor Jorj Besevi loyihasi asosida qurilgani ma’lum.

Ushbu bino Alisher Usmonov sotib olgan ilk ko‘chmas mulk emas.

Moskva tashqarisida yirik yer mulki, Sardiniyadagi villa milliarderga qaraydi.

Bundan tashqari, janob Usmonov 2004 yilda Britaniyaning Syurrey grafligida yirik yer mulkini 10 million funt-sterlingga sotib olgandi, deb yozadi "Sandey Tayms".

Alisher Usmonov nafaqat Angliyada, balki butun dunyoda eng boy futbol jamoalaridan biri - "Arsenal"da ham ikkinchi yirik hissador hisoblanadi.

'Poytaxtlar poytaxti'

"Sandey Tayms" haftanomasining ko‘chmas mulk mutaxassislaridan biriga iqtibosan yozishicha, London "poytaxtlar poytaxtidir".

"Podshohlaru amirlar, sultonlaru dunyoga mashhur biznesmenlar bu shaharni o‘zlarining ikkinchi uylari hisoblashadi.

Shuning uchun ham ularning hammasi bu yerdan uy-joy olib qo‘yishni istaydilar",- deb yozadi "Sandey Tayms".

Haftanomaga ko‘ra, Londonda uy-joyli bo‘lish odamlarning boyligi va muvaffaqiyatidan nishona ekan.

"Forbs" oynomasiga ko‘ra, Alisher Usmonovning boyligi 4 milliard 689 milion dollarni tashkil etadi.

Ammo "Finans" jurnali uning boyligini 6 milliard 763 million, deb yozgan.

Asli o‘zbekistonlik prokurorning o‘g‘li va hozirda Rossiya fuqarosi bo‘lgan janob Usmonov Rossiyada o‘n ikkinchi, Britaniyada esa beshinchi eng boy odam hisoblanadi.

U o‘z boyligini, asosan, po‘lat va temir rudasi biznesi orqali topgan.

Janob Usmonov Kremlga yaqin ishbilarmonlardan sanaladi.

O’tgan yili u o‘z vatani bo‘lgan O’zbekistonda prezidentlikni ko‘zlayotgani haqidagi xabarlarni rad etgan.

"Gardian" ro‘znomasi bilan suhbatda janob Usmonov Prezident Karimov va uning to‘ng‘ich qizi Gulnora Karimovalar bilan yaqin aloqada ekanini inkor etgan.